事情發生喺17/7/2024 凌晨，當時搬左去新屋兩個禮拜左右，嗰日同友人小琪琪玩左全日，夜晚冲完涼，訓覺之前突然醒起唔記得攞老公前兩日去超市買野嘅收據嚟入數，所以就想落樓攞。
夜晚樓梯好黑，但心存僥倖嘅我恃住有小夜燈就諗住唔洗開燈啦，點知由二樓落一樓嘅第一層樓梯就出左事啦。
我睇唔到樓梯同地面之間嘅分別（因為地氈係同一隻顏色），所以叉錯腳腳尖落地。
我已經儘量還原返事發經過，因為都事出突然，加上冇人會估到咁小事都會突然出事㗎嘛…
我即刻尖叫並訓左落地，我係自己瀡落地下嘅，因為腳尖落地之後隻腳傳來劇痛，當時下意識就坐左喺地下啦！
當時嘅感覺係我覺得拉親連住腳指公嘅韌帶ligament,但其實一路最痛都係 mt1同mt2中間嘅位置。講起嚟都有啲慚愧，作為現職骨科護士，竟然都錯判左。
當然，老公都第一時間過嚟睇下我發生咩事啦，佢一開始係笑9我，之後見到我不斷慘叫之時亦都有啲忟憎，有啲手足無措。我當時正處於acute pain,並未能作出啲咩判斷，所以我都係叫佢攞個冰袋俾我先。

哩個痛係前所未有嘅，即使敷住冰，都仍然可以清楚感覺到嗰種一陣陣嘅劇痛。我開始痛到想喊，我老公望住我，表情極度無奈，仲覺得我玩嘢，不過佢都係出於關心，仲話再係咁就要叫救護車同埋報警。
我都好無奈，由於acute pain太痛，我無法評估傷勢，所以一直過左半個鐘到一個鐘我先感覺好返少少，但係隻右腳都係落唔到地，所以我就唯有爬左去一樓客廳嘅梳化坐左一陣。跟住平伏好少少心情之後我就打左去病房請病假，雖然朋友都叫我call救護車，但係我實在唔想增加英國救護車嘅負擔，尤其是知道非緊急救護車動輒要等幾個鐘…就算係老公車我去，都會係一場fight｡
於是我選擇左艱難地爬上樓梯（唔知可以「坐」上去）訓覺。
一覺訓醒，隻腳都係落唔到地，所以我就用左 online嘅111 Service ｡佢都有好清晰嘅指示俾你填寫資料，喺回答佢問題嘅同時佢都做咗第一層嘅分流，佢叫我等護士半個鍾內打俾我。

護士的確半個鍾內打到嚟啦，問完一大輪我話擺唔到隻腳落地，佢就判斷係foot injury而唔係我自己聲稱嘅toe injury｡佢建議我去minor injury unit､原本佢係想幫我book嘅，不過我自己認為可能當時只有9點幾，MIU開10點嘅關係所以book唔到，佢叫我一個鐘內去。

於是我就安排老公車我去啦，由於我住嘅地方並冇MIU，只有First Aid Unit（Google過好似係冇Xray），所以我地要揸車半個鐘到九個字之間。去到之後由於老公勁冇經驗，所以佢搵咗個車位就停咗落去... 絲毫冇體會我作為一個傷殘人士嘅感受。
不過亦都遇到一件好人好事，有個叔叔啱啱睇完醫生，就pass咗張停車飛俾我哋，因為張飛係冇寫車牌而且係可以泊一日嘅！

下回分解：中足骨折 Lisfranc injury ｜在🇬🇧NHS治療全過程（二）

自己包咗elastic 繃帶感覺穩陣啲，醫生仲問係邊個包嘅？


着拖鞋去，實在唔係幾好XD